13 met

 

Lezour finn arive. Avan ki li kit so lakaz gramatin, so determinasyon ti premie kitsoz ki linn pran. Lor bistop avan ki bis lekol arive li rezwe so koregrafi dan so latet. Tou seki linn travay pran so sens zordi. Li zis espere ki li pou capav kalifie. Bann premie class finn pas ase vit. Li pann tro compran ki ban profeser ti pe montre parski so latet ti aiyer. So lespri ti centre lor seki li ena pou fer kan so tour pou arive. Koregrafi-la rest parey, ekzekisyon byen simp me bizin rest konsantre. La clos midi sone ek lerla-mem so leker comans vane. Li sanz so linz, ramas so iniform dan so sak, apre li galoup ziska terrain football colez. Bizin degaze fer enn warm up rapid avan ki profeser P.E. fer lapel bann atlet. Enn tour terrain, enn de etirman, enswit li apros ar kwin reserve pou bann lanse. Linn inscrir li pou eprev lans pwa.

-         Noah Gillot… Lekip Ver! Li prezan?

-         Wi missie, mo la-mem

-         Ok to pou pas an dernie zenn zan. Bon messieurs! Anou coumanse… mo rapel zot bann regleman: pa craz rebor divan, kan fini lanse sorti par deriyer ek pli importan zot pwa bizin rest cole ar zot licou ziska dernie ler sinon li pa pou konte. Mo rapel zot record pou nou categori, 12m50. Nou ena bann bon kandida zordi ek mo espere pou ena bann bon performans. Messieurs bonn sans.

Li zet enn cou dey autour li. Bann kandida-la ti byen pli gran ki li. Zot ti osi pli barake, ena mem enn ki ti de fwa so groser. Zot tou ti pe guet li dan zar wadire li pena so plas isi. Noah fer 1m65 pou 55kg. Franfran tou, li pa ti dan mem kategori. Anplis linn fek rant dan sa kolez-la, li santi li kouma enn outsider.

Noah tou sel kone ki fer linn inskrir li pou sa eprev la. In an inn pase depi ki so frer nepli la. Abel ti enn examp pou li. Enn garcon byen gran ek for dan so lekor me osi dan so latet. Li ti pe prepar li pou vinn enn sportif profesyonel. Dan tanto, zot ti pe al galoupe ansam. Abel ti touzour takinn Noah parski zame li ti reisi bat li lor sprint. So disciplinn prefere ti lanse pwa, Shot Put couma dir en angle. Abel ti pe travay lor enn technik ki pa tou lanser konn fer. Li ti pe travay lor teknik rotasyon ki ti byen konplike. Noah ti akompayn li kan li ti pe repet so bann muvman.

-         Abel ! Ki sa dans bale to pe fer la?

-         Eh ! Aret fatig mwa-la. Pa danse sa. Li mem la baz d’tou parski san li to pwa pa pou kapav al distans ki bizin

-         Pou mwa li zis enn koregrafi.

-         Dan shot put to bizin enn bon melanz la fors ek vites. Sa de-la mars ansam.

-         Ok si to pe dir! Be ki fer to pa fer kouma lezot? Pou zot pli simp. Pa enn koregrafi konplike.

-         Ki fer bizin suiv lezot? Kan to panse enn kitsoz merite to donn to letan ek to volonte, to donne. Pa poz kestyon kan to kone enn kitsoz vo la penn. To donn twa 100%.

Eprev koumanse. Ena impe zelev kinn mase otour ek pe koumans pip pou zot bann kamarad. De premie kinn lanse inn ariv lor 10m. Larmwar de batan so tour. Mem si Noah konfian, lom-la fer li impe per. So nom se Vincent. Li ramas pwa ki pre ar ron lansman ek li met li dan pozisyon. Noah konpran ki so style lanse pou glide. Malgre so gabari, so demaraz ase rapid, so  exploszyon pou muvman final amenn so pwa lor enn distans 12m10.

-         Dapre lord li mem pou gayn sa

-         Tou le lane li mem lor podium

Noah pe ekut seki bann zelev otour pe dir. Li pa pretann pou kass rekor ou mem viz premie plas. So lobzektif, kontign seki so frer inn komanse, seki so frer inn montre li.

 

-         Abel, si teknik ki to servi la bon, ve dir ki, nimport ki kapav ariv fer li, ek ena bann bon performans.

-         Wi, to-mem pou vinn sa lexamp-la. Mo pou montre twa ek to pou reisi. Koumsa li pou servi twa dan lavi kouma enn leson. To kapav reisi si to donn twa le moyen ek si to krwar dan seki to pe fer. Vini Noah anou valse !

-         Dak monn pare! Ki bizin fer…

-         Non to pa ankor pre, avan tou to pou bizin konn mars kouma kanar. Ale asiz lor to lipie ek fer mwa 10 ale retour.

Kan linn reisi metriz kanar, linn ferr lapin. Zot inn pas preske enn mwa pou fer tou sort lekzersis san mem ekzekit enn koregrafi. Li ti fer konfians so frer ek tou seki Abel ti dimann li, Noah ti pe fer. Kan Abel inn santi ki so ti frer inn pre, linn koumans montre li so teknik. Ti ena enn ron ki li ti trase lor enn sali.

-         Noah! Inn ler pou to danse. Me pou koumanse nou pou al byen dousman koumsa to kapav konpran ki to pe fer. Guet byen, lor sali to pou trouv enn bann mark ki monn mete. Lipie gos ek drwat kot bizin pose. Si ban lekar-la tro gran nou pou reaziste apre.

-         Dak

Noah ti suiv pa a pa bann etap ki so frer ti pe montre li. Linn tourne tourne, enn ta fwa linn tombe me zame pann abandone. Linn kontigne ziska ki so koregrafi inn aprouve par so frer. Ziska enn momen zot ti pe ferr sa muvman-la ansam, an synkronizasyon. Kan Abel inn satisfe avek so koregrafi li guet Noah dan so lizie, avek so de lame poze lor so zepol, li dir li:

-         Tonn pare aster, seki to bizin fer se simpleman azut pwa la ek entrenn twa pou envoy li pli lwin ki to kapav. Gard sa princip travay la dan to lavi. Tou kitsoz merit so lapenn. Tonn reisi konpran ki avek determinasyon disciplinn ek travay nou arive. Kouma zordi monn montre twa, twa osi to pou ena devwar transmet to savwar. Parski kan to transmet lerla mem to grandi. Pa blie bann etap importan avan to lanse, relax, to regar touzour drwat, gard to pwisans dan to de lipie, pwa la fer parti to lekor ziska ki to exploze dernie ler pou anvoy li pli lwin ki to kapav. Pa blie rest dan ron ek akompagn to muvman, kouma to dir, dans bale. Enn lot pwin important narnie pa gagn drwa fer obstak lor to larut, to bizin contigne ek manz ar li ziska to gagn rezilta.

 

Kan Abel ti fini dir li sa zot tou le de inn kass enn gran rie. Noah pa ti kompran ki ti enn dernie moman ki li pase avek so frer. De trwa zour apre, li ti gagn nuvel ki Abel inn ale, e li nepli pou retourne. Li pann tro konpran parski zot ti ena enkor pou partaze, enkor pou viv ansam. Li pa ti akcepte so depar. Apre enn bon momen linn konpran el aksepte. Seki rest dan so latet ek so leker se bann dernie parol so frer. Li bizin transmet ek li bizin kontigne. Loportinite inn porte kan nouvo kolez ki linn rentre organiz so sports day. Sak zelev retrouv li dan enn team. So nom ti affise pou team ver. Pandan rasanbleman, bann team leader ti pe rod enn reprezantan dan kategori junior pou pran Shot Put. San ezitasyon Noah inn decid pou inskrir li. Bann la ti impe perplex me Noah avek enn sourir inn dimann zot fer li konfians.

-         Noah Gillot! To tour zen zan.

-         Ok missie!

Li ramas pwa-la ek li rant dan ron lansman. Tou regar brake lor li. Li guet pli divan ek li remark tou bann pike ki indik bann lanse sak kandida. Noah pran enn gran respirasyon. Li pran depi pwin final ek li tras so bann ekar parey kouma Abel ti montre li. Lor so pwin depar, li col pwa-la avek so licou li santi li fer enn ar li. So regar kontign guet lwin e rest fix. So pozisyon ti traver dan ron pa kouma standar dimande, otour li personn pa ti konpran.

-         Eh li pa traver la ?

-         Pwa-la pou al dan bwa sa

Zot tou koumans rie me Noah so obzektif byen defini, pwa-la bizin al pli lwin ki kapav. Li respir enn bon kou, enswit li santi so lipie gos enfons plis. Kouma enn lastikar enn fles kinn rest redi, li exploze lor demaraz, tourne ek an mem tan gard so bann apwi lor sali avek enn lafors ki ti kapav defons li. Li ariv lor so pwin final, li poz so lipie gos enn kout sek ek derasinn sa pwa-la. Li expilse li pli lwin ki li kapav. Linn gagn enn sourir, kouma dir li tann Abel dir li : “Danse Noah, Valse Noah”. Ti ena enn silans otour parski personn pann krwar ki finn arive. Enn, so teknik zame personn pann fer ek deziem so lanse inn tom byen apre Vincent. Li mem pa krwar sekinn arive. Li rest dan ron ziska ki profeser P.E. vinn bouz li.

-         Bonom sa wi. Sa enn lanse. Anou guet komie tonn fer. Met enn pike pou li.

Vincent apros li ek tap so zepol

-         Man! Seki tonn fer-la mari top. Enn mari teknik ek enn mari explozyon sa! Si to pa mind mo tia voudre aprann ar twa. To metriz lor sa teknik-la monstr.

-         Dak si to oule, soup sa! Kan to le.

-         Messieurs nu ena enn bon nouvel zordi. Record inn kase. Inn kase par enn fason extraordiner. Nouvo record pou kategori junior, 13 met. Detenter record missie Noah Gillot. 

Noah santi enn la foule derier li ki koumans criye so nom. Enn santiman for pran dan so lestoma. So premie reflex li guet lao.

-         Abel, tonn al tro vit, impe pli lao, pli lwin ar mwa, me to eritaz zordi inn servi pou permet mwa depass mo-mem. Merci…